ورشة العلوم " الورشة الغذائية 1 - الأسماك "

فى سلسلة الورش الغذائية دى هانعلم أطفالنا معلومات عن فوائد تناول الخضروات والفاكهة واللحوم والأسماك و إيه الفيتامينات الموجودة بها وإزاى بتفيد جسمنا؟ وده هايتم بشكل غير مباشر, يعنى أثناء تناول وجبة الفطار أو الغذاء أو العشاء يمكنكم عمل هذه الورشة بدون أن يشعر الطفل إنه بيحفظ  وبيذاكر درس علوم.

إن شاء الله الورشة دى هاتكون بداية لسلسلة من الورش الغذائية اللى هاتعلم أطفالنا معلومات علمية مفيدة بشكل غير مباشر يعنى لما يجى يأخد فى المدرسة المعلومات دى هاتبقى سهلة وبسيطة بالنسبة له لإن ببساطة ماما وبابا قالوله المعلومات دى كتييير وهما قاعدين سوا متجمعين فى وجبة الغداء أو العشاء.

بكل بساطة هانفترض إن وجبة الغدا النهاردة فيها نوع من اللحوم وهو ( الأسماك)

هانبتدى الورشة و إحنا قاعدين عادى جدا بنأكل الغدا أو العشاء ونسأل الطفل عارف السمك دى ايه فوايده؟ طب فيه فيتامينات إيه؟ طب الفيتامين ده بيفيد الجسم إزاى؟

وطبعا اترك المجال أولا لطفلك وإجتهاده ثم قم بتصحيح معلوماته أو بإضافة معلومات جديدة له.

أولا: يحتوى السمك على البروتين

·      البروتين موجود بشكل كبير فى كل اللحوم ( لحم البقر والماشية والفراخ) وكمان اللبن والبيض

·      ومهم نحصل عليه بإستمرار ليه ياترى؟ لإن الجسم مابيعرفش يصنعه أو يخزنه.

·      هو اللى بيساعدنا نكبر وننمو عشان بيساعد على بناء الأنسجة زى الجلد وتكوين العضلات لذلك  فقدانه عند الأطفال يسبب بطء النمو

عشان كده لازم طفلنا العبقرى يأكل  نصيبه من اللحمة كله عشان يكبر ويقوى.

 ثانيا: يعتبر السمك مصدر ممتاز للفسفور

·      وهو يساعد العظم و العمود الفقري والأسنان على النمو

·      يغذي المخ ويقوي الذاكرة وينشط الأعصاب

·      يدخل في تركيب جميع خلايا الجسم وتركيب بلازما الدم

·      موجود أيضا فى اللبن والبيض وبالذات صفار البيض اللى أغلب الأطفال ما بتحبش تاكله والبقوليات والمكسرات والأناناس

طبعا السمك به فيتامينات كتيرة مثل فيتامين أأ , د , الكالسيوم والزنك , .....

 وله فوائد كثيرة وعديدة ولكن نكتفى بالتركيز على أهم الفيتامينات فى كل وجبة حتى تثبت المعلومة فى ذهن الطفل.

طبعا مش محتاجين نقولكم إن المرة دى هانتناقش أو هانلقن الطفل المعلومات, المرة الجاية هانعمل مسابقة بين الأخوات والفائز له جائزة ولو رمزية, مرة تانية ممكن تكتبى ورقة عليها جملة مثلا " أنا مليانة فسفور"  وكأنها رسالة من السمكة J وتضعيها على طبق الطفل جنب السمكة بتاعتة ووقتها تسأليه فاكر الفسفور ده بيعمل إيه؟ J

وطبعا ياريت كل اللى عنده مقترحات أخرى لا يبخل بها علينا يكتبها فى كومنت حتى يعم النفع والفائدة